Subimos el Puertu Payares. Cómo presta contemplar les obres d´Inxeniería que dende fai mas de cien años acompañen a les peludes reses que pastien na llomba mientres mos averamos a Puente los Fierros. Al pasar per ehí, los enormes guardarraíles mos recuerden que tamién la carretera El Puertu ye un pasu de muncha importancia pal tresporte de mercancíes ente Asturies y la Meseta. Güei ye festivu, asina que, pegadinos a la derecha, entamamos a pedaliar cuesta p´arriba: pocos segundos dempués notamos un poquiñin de mugor na frente y na espalda, asina que abrimos la cremallera de la chaqueta. La verdá que entrenar, non tamos entrenaos, pero esti va ser un recorriu pola teoría de los planos inclinaos, sistemes que, comu na semeya del entamu, permiten recuperar enerxía de les mercancíes que baxen pa apurrir les que suben. Como en una noria de feria, les persones que tan nes cabines que baxen emburrien a les que suben.
D´acuerdu al reló que marca la velocidá, vamos a 10 km/h, polo que el tiempu que mos va a llevar ascender los 12,5 km sedrá de 75 minutos. De otres vegaes sé que puedo baxar a una gran velocidá, casi a 50 km/h. Vamos viendo ya el valle a la nuestra derecha y pasamos por Los Llanos y pol pueblu de Payares, quedenmos les ramples mas dures enantes d´aportar al Parador y entamar subir pa la Estación d´Esquí. Ellí, hay dello ñebe, tovía no ta pa esquiar pero ta la cafetería abierta. Paramos pa un café, y de la faltriquera sacamos un llapiceru y facemos delles cuentes:
Veamos, si envede baxar a 50, vertixinoso, tuviere equí la "Flyer" con motor recuperador, baxaría de xuru, digamos, a una media de 30, teniendo en cuenta que a esa velocidá el recuperador desconéctase solu. Entós en la baxada charía, envede 15 minutos, diez mas, 25. Suponiendo que la batería fuere capaz a recoyer el 30% de la "enerxía potencial" daría mas o menos pa, envede subir a 10 por hora, a 15. "Si", decís, "ya te veo venir, vas contanos que entós ganaríase ena subida 15 minutos". "Pues no, llistes, a ver si vos aplicáis, el tiempu que se gana na subida al pasar de 10 a 15 por hora no ye un cuartu d´hora sinon 25 minutos, ye decir, ente la baxada y la subida, ganamos 15".
En faciendo esa cuenta, miré pal reló y ví que si non entainaba lo que diba ye a facéseme de nueche. Baxando, diba otra vez faciendo cuentes: Y ¿que pasaría si envede tener la Flyer con batería de 8,8 AH, 48V, tuviere ya nel añu 2025 y la batería pudiere cargar no un 30% sino un 50% o incluso un 60%? Pues que, en algún casu, el tiempu de subida baxaría en otros diez minutos y otro poco en la baxada, pero podría tar subiendo y baxando sin tener que recargar, o en tou casu recargando en menos tiempu del que tarda en tomase un café, medianu.
Sirva esti pequeñu exemplu pa dexar ver, pa los que non tean familiarizaos, les ventaxes e inconvenientes de los motores con y sin recuperador d´enerxía. N´un futuru, sedrá tan familiar como llevar el teléfonu movil. Güei, 2017, ya casi 2018, les modernes e-bikes con motor central mos dexen subir una vez, quizá dos si tamos un poco entrenaos, a casi la velocidá llímite, 25 por hora, desde La Pola de Llena hasta la Estación d´esquí: recordar 500 w-h ye como decir que tenéis disponible la potencia que facía Indurain el día el record de la hora.
Comentarios
Publicar un comentario